عـــربــــى منــــــه فيـــــــه

My Photo
Name:
Location: Egypt

انا واحد من البشر حلمى كان السفر جوا ضمايركم او ينطق الحجر

Tuesday, January 08, 2008

اللـــى خـــايف يـــــــروح

اللى خايف يـــــــروح

مابقاش ينفع ننام

ونعيش عمر ف كلام

لازم وقفة رجال

نعدل حالنا اللى مال

لازم نطلب حقوقنا

ويعلى بايدنا صوتنا

كتير وكتير سكتنا

وحق بلدنا اتســــــــوح

واللى خايف يـــــــــروح


ماتت احلام شباب

فى زهرة عمره شاب

دمار وفساد حاوطنا

حشيش دمر شبابنا

قيم ضاعت وراحت

وريحة الفوجر فاحت

وشباب ماشى بيطّـــوح

واللى خايف يــــــــروح


كبار بلدنا نهبوا

خيرنا ومالنا وما شبعوا

مصوا دمانا وجهودنا

باعوا حطام قبورنا

حتى الطفل الرضيع

معروض فى مزاد للبيع

ومش لاقى فى بلدنا مطـــــرح

واللى خايف يـــــــــــــروح


شباب م الفقر هربوا

فى مركب يأس ركبوا

اطفال فى شوارع نايمين

و لل لقمه الحاف مش لاقين

صراخ وصوات وعياط

وانهيار وهدد عمارات

وطفل بيبكى بيصرخ

بابا حبيبى مات

اه يا بلدنا اه

نفسى اضحك وافـــرح

نفسى فى حاجه نفلــــح

نفسى فى عيونكم المــــح

نظره للشعب الميت

وياخد فى تفكيركم مطــــرح

نفسى ونفسى ونفسى

وحكومتنا ..لا تسمـــــــــــح

واللى خايف يــــــروح


Sunday, October 29, 2006

وصمـــــــــــــــــــــة عـــــــــــــــــــــــــــــار

خبر ازعج كل بيت وكل دار

كلنا سمعنا عن حالة السعار

اللى بتعكس لينا حالة الانهيار



مها اكتب مش كفايه

مهما اوصف الحكايه

صعب يعبر كلامى

عن مدى حزنى والامى

ثورة جامحه للجياع

بينعكس فيها الضياع

والانحادر ف القيم

وصرح تقاليدنا انهدم

صعب يوصف قلمى حالى

صدمه هزت كل كيانى


ازاى وصل تفكير شبابنا

ان يتحرش باخته

فين غيرة الرجال

وحفظه لشرفه وعرضه



احنا عايشين جوا غابه

ولا ايـــــــــــــــه

القوى عايش براحته

والضعيف نقضى عليه

البنات اللى بيبكوا

واللى خايفين من مصيرهم

ليكونوا زى غيرهم

قولولى ذنبهم ايه



ايوه كل بنت خايفه

لتقع فريسه ليهم

ايوه لازم لينا وقفه

وباروحنا لازم نحميهم



ايوه لازم نخطى خطوط النار

ونعرف ايه سبب الانهيار

لو سكتنا..يبقى مصيرنا الدمار

اللى حصل فى حقــّــنا

ده وصمة عــــــــــار



ثورة الهياج اللى قامت

قامت من همج ضمايرهم ماتت

واى راجل حر و شهم

النار ف عروقه قادت

ومستحيل بعد اللى شافه

هيفضل فى كهفه ساكت



طعنة جهل غرزت فينا

وقسمت ظهر قيامنا العليا

دينـّـــا واحده يا ناس يكفينا

نرجع ليه بقلوبنا الطاهره

ويا رب يا عالم تهدينا

وتنور بصايرنا العتمه



لازم وقفه قويه بجد

اللى حصل كارثه ودمار

صرح قيامنا خلاص اتهد

وبايدنا نصحح افكار

كفايه بقى عن دينـّــــــــا بعد

لازم يرجع لينا نهار

عار عار عار

اللى حصل ده وصمة عـــــار



Wednesday, October 25, 2006

كل عام وأنتم بخيـــــــــــــــــــــــــــــــــــــــــــــــــر

نداء عاجل للبلوجريه

انا مش فاهم ايه القضيه

مافيش موضوع بيثبت

فى المدونه ديه

كل ما ارفع موضوع

الاقي الكومنت ممنوع

هى ايه الحكايه

ولا ايه القضيه

يكون البلوج بتاعى

نهبوا شوية حراميه

المهم يمكن الموضوع يترفع

المره ديه



تعالوا نهيص بقى

وننسى همومنا شويه

العيد هل علينا

بالكحك والعيديه

واللبس الجديد يا عيال

وصلاة العيد الصبحيه

ونرجع نفطر بقى

فول ومخلل و طعميه

و لا حد هيقولى

فول ايه يا شحات

نفطر لحمه مشويه

خلاص وانا مالى بالاكل

لو حتى تشربوا عصير

ملوخيه بالتقليـــــــــــــــــــه


مره وانا صغير ف العيد

شربت بيبسى كولا

واتارى دى مايه غازيه

والصودا مش معقوله

لقيت بطنى بترقص

على نغمة هولا بولا

وكله من البيبسى كولا

قولت للبقال دى خمره؟

قال بس يا فلاح

دى رغاوى صابونه

تشربها تبقى نظيف

وتلبس الجيبونه

وتبقى واد رشيق

وتتعاكس من البلكونه

قولت يا عزى يا وعدى

هابقى يا ناس مشهوره

واتحول من افندى

لسيدتى القموره

يا حلاوتك يا كوكا كولا



ومره تانيه ركبت

حصان ايجار معفن

وعامل نفسى فارس

قال يعنى واد متمكن

وهوب جرى الحصان

والرعب كلبش قلبى

وطار منى اللجام

ومغص كركب بطنى

ولقيتنى بعيط واصرخ

وماحدش راضى يساعدنى


وسط الزحمه لقيت

حماره بنت عز

صعب عليها حالى

قالت للحصان هش

وقف الحصان وقال

شي حا ياحماره

يا ام احلى وش

ضحكت الحماره وقالت

عاوز تعاكسنى يا حصان

ومهرتك تعرف

وتدينى من الشتيمه دش

لو عاوزنى ف الحلال

انا حماره بنت عز

وبفطر لحمه وفراخ

وبتغدى كمان وز

وبتعشى باتون ساليه

عليه فته ورز


ذكريات كتير للعيد

فى دماغى وحكايات

ومقالب اصحاب طفوله

واصفى الضحكات

مش عاوز اطول عليكم

قوموا اشربوا الشربات

وسيبوا الفرحه تكبر

وانسوا الهم شويه

وورونى الابتسامات


يا اجمل بلوجريه

واعز ناس عليه

وجودكم حواليه

اجمل واكبر هديه

من قلبى ببعت ليكم

ارق واحلى تحيه

وعيد مبارك عليكم

هاتوا بقى العيديه

Sunday, October 01, 2006

يـــــــــــا خــــالـــــــــــــــــق الخــــــلــــــــــــــــــــــــــق



يا خالق الخلق كله بحكمه مقريه

لاهل البصر والبصيره صبح وعشيه


سرك فى بطن التراب

وفى الجبال مكتوب

فى الشمس تصبح بتضحك

وتنام فى حضن غروب


فى النسمه لما تهدى

على الخدود وتقول

فى الزمهرير بختشى

لما هوايا يطول

فى الصيف حبايبى كتير

اكتر من المعقول


والنبته تكبر وتطرح

من كل زهر ولون

الارض وحده...والميه وحده

بسر كـــــن فيكـــــــــــــــــــــون


حادق ومر وحلو

يا رب سبحانك

كل الوجود حكمتك

والخلق من شأنك


شوف الرمال عـــــــدها

تقدر مدام مغرور؟؟

علمك ده صفر كبير

فى العالم المسطور

سلمها للى خلق

هاتعيش سنين مستور


شوف النجوم فى السما

تقدر تطولهالى

او فى البحار من كنوز

تقدر تجيبهالى



فضلك علينا يا ربى

فوق حدود الشكر

وقدرتك مع رحمتك

شموع لاعظم فكر

يا خالق الخلق كله بحكمه مقريه

لاهل البصر والبصيره صبح وعشيه

Friday, September 22, 2006

دنـــيــــــــــــــانـــــــــــــــــــا

دنيانا شروق وغروب

ومابينهم هوا مكتوب


أدى نجمه ونجمايه

بيقضوا الليل فى غنوايه

ويبكوا لما يجى الفجر

ويشكوا الشمس لسمايا


وأدى طير بيغرد

هنا وهناك

ترد طيره وتقوله

انا بهواك

وياخد كل طير طيره

لاخر ما تشوفه عينه


وفى لحظه تغيب الشمس

ويسكت الغنى والهمس

ويبكى الطير وينادى

يقول يا شمس


تعالى يلا من تانى

وهاشكى قمرنا لزمانى

كأن قمرنا ده الجانى


وتتقابل نجوم الليل

بعشق وغنى المواويل

ولما تانى يجى الفجر

يحس النجم بطعم الغدر

ويبكى النجم من تانى

ويشكى الشمس لزمانى

وكأن الشمس دى الجانى


وأدى دنيانا ما بين

شروق وغروب

بكى فى فراق

وفرحه فى لقى المحبــــــــــــــــوب

Tuesday, September 19, 2006

محمــــــــــــد رســــــــــــــــول اللـــــــــــــــــــــه

فســـــــــــادستان

جنينه كانت حلوه زمان

جه جناينى مسك البستان

وانبهر من كتر الفواكهه

والخير اشكال والوان

قال لنفسه انا اشبع الاول

و الباقى منى أدّيه لشحاته الغلبان

وفاتت سنين وسنين

والجناينى لسه جعـــــان



وكانت الجنينه ليها عادات وتقاليد

والدين بيحكمها

بقبضه من حديد

وبدأ الانحلال يدخلها

وكل مدى يزيد

وبداء الاستهتار بالقيم

والعادات والتقاليد

واللى يحافظ على تقاليده

يبقى رجعى وعبيط



وبدأت كل شويه

التنازلات تكتر

ويوم عن يوم بقينا

لقيمتنا بنخسر


وابتدى الهجوم علينا

من كل اتجاه

سب وشتيمه وقذف

فى حبيب الله

فى قدوتنا وقائدنا

محمد رسول الله


بركان غضب جوايا

ونار قايده فيه

اعتذاره مش كفايه

لازم وقفه قويه


اعدائنا يوم عن يوم

بيقوى صوتهم ويعلى

لازم ايمانا يزيد

ويكون ايمانا اقوى

ونحط الايد ف الايد

ورسولنا هو القدوه


يا رافع رايه الاسلام

جوه حصن قلبك

حطم قيود لسانك

واخرج من سجن صمتك

اثبت لحبيبك النبى

حبك برد فعــــــــلك



Sunday, September 17, 2006

كــــــــــــــــــــلام كبيـــــــــــــــــــــــــر

كلام كبير

برنامج على قناة المحور

محتاج شوية تفكير

ويبقى له اسس ومعايّر


ماينفعش نقول لا حياء ف الدين

ونتكلم فى كل شئ يخص المراهقين

وكلام يحرج وشكاوى من المتجوزين

واللى يقول مش عارف ايه

وطبعا كلكم فاهمين


ازاى نجراء الناس بالشكل ده

وبنات وولاد ف عمر الزهور

نفتح عيونهم طب ليه كده؟

ما تلموا بقى الدور

دول لسه فى عمر الزهور


انا لسه قط مغمض

وخايف على نفسى من الخرابيش

خايف على نفسى يا ناس

من لحظه ضعف وطيش

وفى لحظه واحده ابقى

مفلس تاجر الحشيش

وانحرف والعب طوله

واقول شيش بيش



من يوم ما شفنا الدش

والقنوات الفضائيه

وبقى بيحمر الوش

وكل دقيقه غازيه

وهشك هشك بش

وبنات ميه ميه

وانا قاعد وحدى بنش

والدمعه ماليه عينيه

نفسى ابقى ممثل

واعمل ادوار غراميه

وادوق الحلو كله

وابعد عن التقليّــه


ويا عينى على الفيديو كليب

والرجل اللى بتــــدب

وانا قاعد على الكرسى بشب

يمكن ادخل جوه الشاشه

واعمل ادوار حب

وامشى انا والبطله

وناكل ترمس ولب

واعمل مشهد غرامى

احب فيه واتحب

وامسك ايد البطله

واشدها بايدى وهوب

وقبل ما اكمل المشهد

الاقى المخرج الرخم

بيقول خلاص ستوب


احلامى ف البلاعه

ابقى مشهور وبتاعه

والبنات تجرى ورايا

وتطلع عليه اشاعه


انى اتجوزت نانسى

واليسا وهيفاء

ونعمل فيديو كليب

واوا واء واء

وتقولى بوس الواوا

اقولها لاء لاء


هاتكلى بعقلى حلاوه

لا واوا ولا اوفــه

انا عاوز اغنيه جديده

اسمها بوس القطه


بوس القطه بوس

وحاسب يا نانوس

اصل القطه تخربش

وتهفك بالدبوس


واجى على نانسى ابص

تقولى اه ونص

اوعى تحسبنى دلوعه

لا اصحى وفوق وبص

انا ف الطشت منقوعه

بغنى اه ونص

ورجلى باينه على الشاشه

والشعب كله بيبص

يعنى باشاره منى

الرجاله تـــــترص


واليسا ياعينى يا ليل

والشعر الغجرى الطويل

والقد الحلو الجميل

انا نفسى اعيط خلاص

حد معاه مناديل


وأبقى مشهور وليه الاف المعجبات

حريم وبنات واجمل و ارق ستات

يلا قوموا وزعوا قطايف وشربات

على روح مفلس افندى الرايق

فقيـــــــــــــد الفنـــــــانات