دنـــيــــــــــــــانـــــــــــــــــــا

دنيانا شروق وغروب

ومابينهم هوا مكتوب


أدى نجمه ونجمايه

بيقضوا الليل فى غنوايه

ويبكوا لما يجى الفجر

ويشكوا الشمس لسمايا


وأدى طير بيغرد

هنا وهناك

ترد طيره وتقوله

انا بهواك

وياخد كل طير طيره

لاخر ما تشوفه عينه


وفى لحظه تغيب الشمس

ويسكت الغنى والهمس

ويبكى الطير وينادى

يقول يا شمس


تعالى يلا من تانى

وهاشكى قمرنا لزمانى

كأن قمرنا ده الجانى


وتتقابل نجوم الليل

بعشق وغنى المواويل

ولما تانى يجى الفجر

يحس النجم بطعم الغدر

ويبكى النجم من تانى

ويشكى الشمس لزمانى

وكأن الشمس دى الجانى


وأدى دنيانا ما بين

شروق وغروب

بكى فى فراق

وفرحه فى لقى المحبــــــــــــــــوب

محمــــــــــــد رســــــــــــــــول اللـــــــــــــــــــــه

فســـــــــــادستان

جنينه كانت حلوه زمان

جه جناينى مسك البستان

وانبهر من كتر الفواكهه

والخير اشكال والوان

قال لنفسه انا اشبع الاول

و الباقى منى أدّيه لشحاته الغلبان

وفاتت سنين وسنين

والجناينى لسه جعـــــان



وكانت الجنينه ليها عادات وتقاليد

والدين بيحكمها

بقبضه من حديد

وبدأ الانحلال يدخلها

وكل مدى يزيد

وبداء الاستهتار بالقيم

والعادات والتقاليد

واللى يحافظ على تقاليده

يبقى رجعى وعبيط


وبدأت كل شويه

التنازلات تكتر

ويوم عن يوم بقينا

لقيمتنا بنخسر


وابتدى الهجوم علينا

من كل اتجاه

سب وشتيمه وقذف

فى حبيب الله

فى قدوتنا وقائدنا

محمد رسول الله


بركان غضب جوايا

ونار قايده فيه

اعتذاره مش كفايه

لازم وقفه قويه


اعدائنا يوم عن يوم

بيقوى صوتهم ويعلى

لازم ايمانا يزيد

ويكون ايمانا اقوى

ونحط الايد ف الايد

ورسولنا هو القدوه


يا رافع رايه الاسلام

جوه حصن قلبك

حطم قيود لسانك

واخرج من سجن صمتك

اثبت لحبيبك النبى

حبك برد فعــــــــلك

كــــــــــــــــــــلام كبيـــــــــــــــــــــــــر

كلام كبير

برنامج على قناة المحور

محتاج شوية تفكير

ويبقى له اسس ومعايّر


ماينفعش نقول لا حياء ف الدين

ونتكلم فى كل شئ يخص المراهقين

وكلام يحرج وشكاوى من المتجوزين

واللى يقول مش عارف ايه

وطبعا كلكم فاهمين


ازاى نجراء الناس بالشكل ده

وبنات وولاد ف عمر الزهور

نفتح عيونهم طب ليه كده؟

ما تلموا بقى الدور

دول لسه فى عمر الزهور


انا لسه قط مغمض

وخايف على نفسى من الخرابيش

خايف على نفسى يا ناس

من لحظه ضعف وطيش

وفى لحظه واحده ابقى

مفلس تاجر الحشيش

وانحرف والعب طوله

واقول شيش بيش



من يوم ما شفنا الدش

والقنوات الفضائيه

وبقى بيحمر الوش

وكل دقيقه غازيه

وهشك هشك بش

وبنات ميه ميه

وانا قاعد وحدى بنش

والدمعه ماليه عينيه

نفسى ابقى ممثل

واعمل ادوار غراميه

وادوق الحلو كله

وابعد عن التقليّــه


ويا عينى على الفيديو كليب

والرجل اللى بتــــدب

وانا قاعد على الكرسى بشب

يمكن ادخل جوه الشاشه

واعمل ادوار حب

وامشى انا والبطله

وناكل ترمس ولب

واعمل مشهد غرامى

احب فيه واتحب

وامسك ايد البطله

واشدها بايدى وهوب

وقبل ما اكمل المشهد

الاقى المخرج الرخم

بيقول خلاص ستوب


احلامى ف البلاعه

ابقى مشهور وبتاعه

والبنات تجرى ورايا

وتطلع عليه اشاعه


انى اتجوزت نانسى

واليسا وهيفاء

ونعمل فيديو كليب

واوا واء واء

وتقولى بوس الواوا

اقولها لاء لاء


هاتكلى بعقلى حلاوه

لا واوا ولا اوفــه

انا عاوز اغنيه جديده

اسمها بوس القطه


بوس القطه بوس

وحاسب يا نانوس

اصل القطه تخربش

وتهفك بالدبوس


واجى على نانسى ابص

تقولى اه ونص

اوعى تحسبنى دلوعه

لا اصحى وفوق وبص

انا ف الطشت منقوعه

بغنى اه ونص

ورجلى باينه على الشاشه

والشعب كله بيبص

يعنى باشاره منى

الرجاله تـــــترص


واليسا ياعينى يا ليل

والشعر الغجرى الطويل

والقد الحلو الجميل

انا نفسى اعيط خلاص

حد معاه مناديل


وأبقى مشهور وليه الاف المعجبات

حريم وبنات واجمل و ارق ستات

يلا قوموا وزعوا قطايف وشربات

على روح مفلس افندى الرايق

فقيـــــــــــــد الفنـــــــانات

حكـــــــــــــــــــــــومه مركــــــــــــــــــــــــــزيه

ياحكومه يا مركزيه

الشباب هما الضحيه

ومصرنا من غير جهودهم

تبقى صحن مهلبيه

يا حكومه يا مركزيه


يا حكومه الصبر طال

وشغلنا اصبح محال

مصر دى برضه بلدنا

ولا احنا يا ناس هفيه

يا حكومه يا مركزيه


يا حكومه الجامعه ليه

وليه علامنا اللى فيه

جيبنا يمكن ميه ميه

وبرضه ضعنا ودى القضيه

يا حكومه يا مركزيه


يا حكومه خلاص قرفنا

والشتا بقى زى صيفنا

فى الشوارع والقهاوى

ضاع علامنا فى الحكاوى

شوفى حالنا ولو شويه

يا حكومه يا مركزيه


احنا ضعنا

والبنات من غير جــــواز

ازمه صعبه

لا عمل ولا جهاز

امتى بس تبصوا لينا

الشباب ودع عينيا

واللى باقى يدوب شويه

يا حكومه يا مركزيه


يا حكومه ما بنّا ناس

عايشه ع الهبش وخلاص

معاها ياما فلوس كتير

والجنيه اصبح سفير

وياه ناس بايدين قويه

يا حكومه يا مركزيه


يا حكومه فيه الــــــــــه

هو لينا نصر وجاه

وربنا بس فى سماه

بقدرته يحل القضيه

يا حكومه يا مركزيه

جــــــــــــــــاموســـــتى

احساس جميل بيهز كيانى

وشعور بالحب سكن وجدانى

و فى لحظة ضعف

قولتلها وحشانى

الغرور مالاها مابقيتش عوزانى



ولا كأنى صحن فته

كلت منه حته

وراحت رميانى



دى الجاموسه جرحتنى بقوه

ومنعت عنى اللبن والقشطه

يا جاموسه ظلمانى



انا مش طمعان ف اللحمه

ولا عاوز ادوق خدودك الطعمه

ولا بضحك عليكى بحنانى



ياجاموستى وكل حياتى

بعدك عنى سبب لاهاتى

انا حبيتك اكتر من حكومتى

واكتر من زليخه مراتى

بكره هتعرفى قيمتى

واسالى حتى حماتى



ياجاموسه ماتفرجيش الزريبه علينا

وماتخليش البهيمه البمبى تشمت فينا


يا جاموسه يا حلوه زى البسبوسه

حكومتنا الحلوه بتدى الشعب لبوسه

والشعب بيقول تحيا حكومتنا المحروسه

ويحيا الحب الصادق وتحيا الجاموسه


فى زريبة الحب لقيت اتنين حمير

حمار بيبوس حبيته

وحماره قاعده بتشرب عصير

وجحش بيقول يا بابا يا حمار

هو صحيح هيطلعلى جناح وهاطير

قاله ايوه يا حبيبى

لما امك تبقى نانسى وتاكل فطير

سكت الواد وقال يبقى فهمت

مهما احلمنا واتكلمنا

هنفضل برضه حميــــــــــــر

بهــــــــــــــــــــــــــــــــــانه الجعـــــــــــــــــــــانه

الواد شحته ابن بهانه

امه كانت سيت غلبانه

طلبت يوم تشوف اللحمه

وبعتت طلب للوزاره

بامضاء بهانه الجعانه


بعد 55 سنه

ردوا عليها قالولها تعالى

مكتوبلك يا سيتى الهنا

اصلوكوا شعب علينا غالى

قالت يا رب يسعدكم

ومن الطيبه دى ما يحرمكم

قالت بس ليه طلب

قالولها تسلمى على مولانا؟؟؟

بصتلهم بصه عجب

قالتلهم هو انا طمعانه

انا بس عاوزه المسها

اللحمه وبايدى احضنها


قالولها طلبك مرفوض

انتى كده بتخطى حدود

اللحمه دى منطقه محذوره

واخرك تشوفيها ف الصوره

قالت يا بنى خلاص انا اسفه

اصلى جاهله ومعذوره

قاموا طردوها وعانوا الصوره

وطلع مولانا على المقصوره


قال كلمه اخيره للشعب

اللى ماعندوش ريحة الدم

ادى بهانه طمعت فينا

اما الشعب ده ظالم ظلم


وقال مولانا قرار جمهورى

ممنوع ياكل الشعب لعام

قولت يا لاهوى الكشرى ف زورى

قالى طلع الكشرى قوام

بس الكشرى نزل بطنى

قالى بتعصى يا خاين امرى


خدوه وارموا ف زنزانه

هو وكل الشعب الخاين

وخدواواحبسوا البت بهانه


جوه السجن ملايين كنا

وبكرباج الفقر جلدنا

ومن كتر الهم صرخنا

نزف الدم ومات الكل

وحكومتنا عايشه ف الظل

واللعبه بانت وفهمنا

مهما قولنا واتكلمنا

السياف ضارب اعناقنا

وف ايدنا ربطولنا قيدونا

وجوه جناجرنا خلاص قدروا

يكتموا فينا صرخنا وصوتنا

عايشين موته ومش عايشين

وناقصنا شهاده لوفتنـــــــــا

شى يا حمـــــــــــــــار

بعد طول الانتظار

والترحال وطريق المرار

جالى جواب من القوه العامله

بيقولى ضاع مننا حمار

ولازم كل الشعب يدور

والا هنضربكم بالنار


قولت يالاهوى يا حوستى يا لوصتى

لازم ادور بقى بضمير

على مولانا الجحش الصغير

ليضيع عمرى اونطه يا خويا

قومت ناديت البت سهير

قولتلها هاتى لجام ومخده

قالت مالك يا بويا خير

قولتلها بس يا بنت الجزمه

لازم نلاقى حمارنا الامير


ركبت حمارتى وقولت يا واد

لف بقى كل البلاد

وارض تشيلنى وارض تحط

وكل شويه حمارتى تفط

وانا ف طريقى شريط العمر

دار فى نفوخى بكل ما فيه

من يومى عايش ف المر

وابويه الفقر حانيه

واخواتى ف الكفر واهلى

اللى شبابهم عجز بدرى

وامى وبلاص المش

اللى وقع مره على سطح

ابن العمده وكسر الدش


واخواتى وقلوط الملك

والرقاصه اللى بزمبلك

والواد جمعه ابن الحلاق

بقى نايب عن كفر بولاق

بعد ما سافر بندر مصر

وعرف خدام شغال ف القصر

فجاءه نقل لمدينة نصر

وركب عربيه وليها سواق

يا بختك يا بن الحلاق


المهم نرجع لحمارنا

اللى بعد سنين ف سفرنا

طلع حمار مالوهش وجود

واتارى الواد بن عبدالموجود

اللى شغال ف البريد

بيحلم بيوم اتعين

لو حتى ف صالون مزين

وقالى بهزر وياك يا سعيد

هو يا راجل انتى بتحلم

القوه العامله تبعتلك

ام انت طلعت عبيط

والله معاك حق يا منيل

هاتى الفاسه يا بنت الجزمه

وتعالى ورايا ع الغيط

اما الشعب ده شكله عبيــــــــــــط